راچڵەکین نوێترین کتێبی نەبەز گۆران چاپ دەکات

2341 جار خوێندراوەتەوە کات08:22 بەروار13-11-2018
راچڵەکین نوێترین کتێبی نەبەز گۆران چاپ دەکات
 
راچڵەکین-
 
رۆمانی - مازیاری شەنگالی- نوێترین رۆمانی - نەبەز گۆران-ە، بەسپۆنسەری دەزگای-راچڵەكین - بەم نزیكانە لە ناوەندی - ئەندێشە-  چاپ و بڵاو دەكرێتەوە.
 
بەپێی لێدوانی نووسەری رۆمانەكە بۆ راچڵەکین، فەزای ئیشكردنی ئەم رۆمانە:  لەسەر ئەوكارەساتەیە  لەم دوایەوە بەسەر ئێزیدییەكاندا ھات، فەزای رۆمانەكە تانھا لەو گۆشە نیگایەوە سەیری كارەساتەكە ناكات جوڵەیەكی ناتەندروستی ھێزێكی توندرەوبوو  بەسەر ئێزیدییەكانیدا ھێنا، بەڵكو كێشەی ئەو ئایینانە دەخاتەروو لەم ناوچەیە باڵادەستیان نییەو بەردەوام لەژێر ھەرەشەی گوتاری فاشیەتدان.
 
مازیاری شەنگالی و ساری كاكەیی، دوو حیكایەت خوێنن،  دەمانبەنەوە ناو مێژووی ھەردوو ئاینەكەو ھەریەكەیان لە گۆشە نیگای خۆیەوە، ئەو دیوە تاریك و مەترسیدارەمان پیشاندەدەن، فاشیەتی ئایینی و فاشییەتی حیزب چۆن بوونەتە مەترسییەك بۆ سەر ژیانی  ئەوانی تری دەرەوەی خۆیان. پاشا لەناو فەزا گشتییەكەی سیاسەتی حیزبیدا ئەو دیوە دەخاتە روو، كە دەریابی دەستنووسەكان وەك فریاد رەسێك دێت ئومێدی گۆڕانكاری بچێنێت، بەڵام مەرگی دەریابی دەستنووسەكان، دەبێتە مەرگی ئومێدەكان و پاش خۆی خەونی گۆڕانكاری دەبێتە خەونی برەودان بە گوتاری فاشی بۆ لێدان لە جیاوازییەكان.
 
نەبەز گۆران دەڵێت: ئەشێت ئەم رۆمانە زیاتر ھەوڵێك بێت بۆ پیشاندانی ئەو پێكدادانانەی لەم ناوچەیەدا بەھۆی فاشییەتەوە بەر ھەر یەكێك لە ئێمەو بەر ھەر یەكێك لە ئایینەكان و جیاوازییەكان دەكەوێت. فەزای نا تەندروستی گوتاری باڵا، دۆخێكی دروستكردوە ھەموومان دەرك بەو مەترسییە گەورەیە بكەین ئەم گوتارە بەرھەمی دێنێ.
 
راشیگەیاند: دەشمەوێت سوپاسی دەزگای - راچڵەكین- بكەم سپۆنسەری رۆمانەكەیان خستە ئەستۆی خۆیان. 
سوپاسی -ئەندێشە- بكەم بۆ ماندووبوونیان كە بە شێوەیەكی پوخت پێشتر رۆمانی - میرنشینی خاڵ و خۆڵ-یان چاپكردوو، بریاڕیشە جگە لەم رۆمانە نوێییە، سەرجەم رۆمانەكانی دیكەم چاپ بكاتەوە.
 
نەبەز گۆران، نووسەرو رۆژنامەنووس خاوەنی دەیان کتێبی ئەدەبی و رەخنەییە، یەکێکە لەنووسەرە ناودارە گەنجەکان لە باشووری کوردستان و پارچەکانی تر.