مانگرتنی گیوڤەن پێی نایە 197 هەمین رۆژەوە

133 جار خوێندراوەتەوە کات02:20 بەروار23-05-2019
مانگرتنی گیوڤەن پێی نایە 197 هەمین رۆژەوە
راچڵەكین-

مانگرتنی لەیلا گیوڤەن، هاوسەرۆكی كۆنگرەی كۆمەڵگەی دیموكراتیك (كەجەدە) و پەرلەمانتاری جۆلەمێرگی هەدەپە، پێی نایە 197 هەمین رۆژەوە.

گیوڤەن لە رۆژی 8ی تشرینی دووەمی 2018 وەك ناڕەزایەتییەك لەبەرامبەر گۆشەگیری سەر عەبدوڵا ئۆجالان- رێبەری زیندانیكراوی پەكەكە لە ئیمراڵی، مانگرتنی لەخواردن راگەیاند تا ئەو كاتەی گۆشەگیرییەكە هەڵدەگیرێت.

هاوكات، مانگرتنی ناسر یاگز، ئەندامی هەدەپە لەشاری هەولێر پێی نایە 184 هەمین رۆژییەوە.

رۆژی 16ی ئایار، عەبدولحەمید گول، وەزیری دادی توركیا رایگەیاند، بڕیاری گۆشەگیری سەر عەبدوڵا ئۆجەلان، رێبەری پارتی كرێكارانی كوردستان (پەكەكە) لەگەڵ پارێزەرەكانی هەڵگیراوە.

وتیشی، "سەڕەڕای ئەوەی بڕیارەكە هەڵگیراوە، بەڵام گۆڕانكاری لە یاساكە كراوە و سنور و چوارچێوەی چاوپێكەوتنەكان بە شێوەیەكی ورد لە لایەن یاساوە رێكخراوە."

لەلایەن خۆشیانەوە، پارێزەرانی عەبدوڵا ئۆجالان رێبەری پەكەكە راگەیەندراوێكیان سەبارەت بە لێدوانەكەی وەزیری دادی توركیا بڵاوكردەوە و رایانگەیاند، هەرچەندە دادگا قەدەغەی سەر دیدارەكانی هەڵگرتوە، بەڵام ڕێگریی لە چاوپێكەوتن لەگەڵ ئۆجالان دەكرێت.

لەو راگەیەندراوەدا ئاماژە بەوەكراوە:" بە گوێرەی لێدوانی وەزارەتی داد، كاتێك بڕیاری هەڵگرتنی قەدەغە‌ دەدرێت، دیداری پارێزەران بەشێوەیەكی ڕێكوپێك ئەنجام دەدرێن، هەروەها مافە یاساییەكانی برای ئۆجالان بۆ دیدار،  چاوپێكەوتنی خانەوادە و پارێزەران، پەیوەندییەكان لەڕێگای تەلەفۆن، نامە و ئامرازەكانی دیكە ناچارییەكی یاساییە."