رێواس فایەق پەیامێكی بڵاوكردەوە

902 جار خوێندراوەتەوە کات02:33 بەروار14-01-2020
رێواس فایەق پەیامێكی بڵاوكردەوە

راچڵەكین-

سەرۆكی پەرلەمانی كوردستان خۆشحاڵی خۆی نیشاندەدات بەوەی:" لە كەشوهەوایەكی دیموكراتی و پەرلەمانییدا گفتوگۆ و ڕا جیاوازەكان لە ناو پەرلەماندا لەسەر پڕۆژەی چاكسازی بەڕێوەچوو." 

رێواس فایەق، ئەمڕۆ سێشەممە 14-1-2020 لە راگەیەندراوێكدا كە وێنەیەكی ڕەوانەی ( راچڵەكین) كراوە ئاماژەی بەوەكردووە:" ئەوە خاڵی بەهێز و زیندووی ئەم خولەی پەرلەمانە و پەرلەمانیش دەبێت وابێت، چونكە جیاوازی ڕوانگەی پەرلەمانتار و ئازادیی دەربڕین مافێكی دەستوریی و یاساییە."

دەشڵێت:" گرنگ ئەوەیە لە هۆڵی پەرلەمان هەمووان وەك یەك دەرفەتی گوزارشت لە خۆكردنیان پێدەدرێت و بەرئەنجامی ئەم گوزارشت لە خۆكردنەش دەشێت هەندێجار بەریەككەوتنی لێبكەوێتەوە."

پەرلەمانی كوردستان لە دوو رۆژی رابردوودا، زۆربەی بڕگە و ماددەكانی پرۆژەیاسای چاكسازیی پەسندكرد و رۆژی پێنجشەممە دەنگ لەسەر پڕۆژەیاساكە دەدات.

لەدانیشتنی رۆژی دووشەممەی پەرلەماندا، لەكاتی قسەكردن لەسەر بڕگەو ماددەكانی پرۆژە یاسای چاكسازی، گرژی و ئاڵۆزی لەنێوان ژمارەیەك پەرلەمانتاری فراكسیۆنەكانی پارتی، یەكگرتوو و نەوەی نوێ ڕوویداو، دواتر دۆخەكە هێوركرایەوە.

پرۆژەیاسای چاكسازی لە مووچە و خانەنشینی و دەرماڵە و ئیمتیازاتەكانی دیكە، لە 19 ماددە پێكهاتووە، لەكاتی خوێندنەوەی دووەم بۆ پرۆژەكە، وەزیرە پەیوەندیدارەكان لە پەرلەمان ئامادەبوون و وەڵامی پرسیاری پەرلەمانتارانیان دایەوە و روونكردنەوە لەبارەی ماددەكانی پرۆژەكە درا.