هەڵكەوت زاهیر بانگهێشتی سعودییە دەكرێت

301 جار خوێندراوەتەوە کات03:02 بەروار17-01-2020
هەڵكەوت زاهیر بانگهێشتی سعودییە دەكرێت

راچڵەكین ـ
 
زۆرترین دەركەوتنی لەگەڵ ئافرەتانە، لەسەر ئەمەش بەردەوام لە تۆڕە كۆمەڵاتییەكاندا توانجی لێدەدرێ. هونەرمەندی ئاوازدانەر هەڵكەوت زاهیر باسی نێوانی لەگەڵ ئاین دەكات و دەڵێت نێوانیان باشە و تاوەكو ئێستا شەش جار عومرەی كردووە.
 
- نێوانت لەگەڵ ئایین چۆنە؟ زۆر جار لە مزگەوت دەبینرێی و چەند جارێكیش عومرەت كردووە.
 
هەڵكەوت زاهیر: من هەر لە منداڵییەوە نێوانم لەگەڵ ئایین باش بووە. فەرزەكانی نوێژ و رۆژووم جێبەجێ كردووە. رۆژانە زیاتر لە دوو سەعات گوێ لە قورئان دەگرم. رۆژ نییە گوێ لە قورئانخوێنان منشاوی و عەبدولباست نەگرم، لە نوێژی بەیانییەوە تاوەكو عیشا بەبێ دواكەوتن دەكەم. هەروەها نوێژی هەینی لەلای من زۆر گرنگە، لە هەر شوێنێك بم دەبێت نوێژی هەینی بكەم. هەموو ساڵێك دەچمە عومرە. كەسێكی زۆر لەخوا ترسم.
 
- بەڵام كاری هونەری و ئایینی لە یەك كاتدا دەكرێت؟
 
هەڵكەوت زاهیر: من كاری هونەریم پێ حەرام نییە، لەگەڵ شێخەكانی ئەزهەر لە میسر زۆر گفتوگۆمان كردووە، ئەوان دەڵێن كاری هونەری حەرام نییە، بەڵام لێرە تەفسیری دیكەی بۆ دەكرێ. خەڵك پێی سەیرە من كاری هونەری دەكەم و لەگەڵ ئەوەشدا سەردانی مزگەوت دەكەم و عومرەش دەكەم، باوەڕ دەكەن چوونی من بۆ مزگەوت بووەتە هەواڵ و لە سۆشیالمیدیا دەنگی داوەتەوە؟
 

- زوو زوو سەردانی سعودیە دەكەیت، پەیوەندیت لەگەڵ سعودییەكان چۆنە؟
 
هەڵكەوت زاهیر: پەیوەندییەكی زۆر باشم لەگەڵ هەندێكیان هەیە. داوەتنامەیەكم لە سعودیەوە بۆ هاتووە،  بڕیارە پێش هاتنی مانگی رەمەزان سەردانی سعودیە بكەم. لە هەموو عێراق دوو كەس داوەتكراون لە كوردستان من و لە عێراقیش یەكێكی دیكە. رێوڕەسمێكی مەزنە بۆ ئەوانەی بەرهەمهێنەرن لە بواری هونەری، هەموو وڵاتانی عەرەبی نوێنەریان ئامادە دەبێت، پێموایە یەكێك دەبێت لەو ئیڤێنتە گرنگەكانی رۆژهەڵاتی ناوەڕاست.
 
- ماوەیەك بوو سەرقاڵی ئاوازدانان بۆ قورئان بوویت. بەردەوامی لەسەر ئەو كارە؟
 
هەڵكەوت زاهیر: پرۆژەیەكی مەزنم لەسەر تۆماركردنی خوێندنەوەی قورئان هەیە، تا ئێستا زیاتر لە 60 سەعات قورئانی تۆماركراوم هەیە كە بەدەنگی چەند قورئانخوێنێكی ناودار تۆمار كراوە. دەیان مامۆستای ئایینی هاتوونەتە لام شێوازی قورئان خوێندنم بەشێوەیەكی ئەكادیمی فێركردوون، هەروەها ئاوازم بۆ چەند قورئانخوێنێكی عەرەب داناوە، مەبەستم لە ئاواز، شێوازی خوێندنەوەی قورئان و چۆنیەتی دەربڕینی مەقاماتە، بۆ هونەرمەند عەمار كوفی چەند ئایەتێكم تۆماركرد. بەنیازم بۆ رەمەزانی ئەمساڵیش كۆمەڵێك كاری دیكە لە بواری قورئان خوێندندا تۆمار و بڵاوبكەمەوە.
 
- زیاتر دەنگی كامە قورئانخوێنی كوردت بەلاوە خۆشە؟
 
هەڵكەوت زاهیر: یەكێك لەو دەنگەخۆشانەی كە بەشێوەیەكی زۆر جوان قورئان دەخوێنێ، كاك عەبدولقادری كوردییە كە من زۆر گوێی بۆ دەگرم. قسەشم لەگەڵ كردووە بۆ ئەوەی چەند كارێكی بۆ تۆمار بكەم. كاك عەبدولغەفاریش یەكێكە لەو دەنگخۆشانەی قورئان زۆر بە سۆز دەخوێنێت.
 
- زۆر جار عومرەت كردووە و بڕیارە ئەمساڵیش عومرە بكەی، پێتخۆشە بە حاجی هەڵكەوت بانگت بكەن؟
 
هەڵكەوت زاهیر: من هێشتا حەجم نەكردووە، تەنیا عومرەم كردووە، بەڵام بەشانازییەوە زۆر ئاساییە بە حاجی بانگم بكەن، خۆشحاڵ و شادومانم بەو ناوە، چونكە من زیاتر لە شەش جار سەردانی مەككەم كردووە و ئارامی بە دڵ و دەروونم دەبەخشێ.
 

- لەگەڵ بەشێك لە مەلاكانی كوردستان پەیوەندییەكی باشت هەیە بەتایبەتی مەلا عەلی.. ئەم پەیوەندیانە چۆن دروستبوون؟
 
هەڵكەوت زاهیر: پەیوەندی زۆر باشم لەگەڵ زۆر لە مامۆستایانی بەڕێزی ئاینی هەیە، جگە لە مامۆستا مەلا عەلی، لەگەڵ مامۆستا عومەر چنگیانی پەیوەندییەكی توندوتۆڵمان هەیە، لەگەڵ زۆر لە مەلاكانی كوردستان پەیوەندیمان هەیە، باس لە ئایین و هونەر دەكەین. مامۆستا مەلا عەلی زۆر خۆشەویستە، زۆر خەڵكی نەخۆش لەڕێی منەوە چوونەتە لای مامۆستا عەلی و چاكیش بوونەتەوە. بەداخەوە لە سۆشیالمیدیا زۆر هێرشی دەكرێتە سەر، بەڵام ئەو كەسایەتییەكی بە‌هێز و ئارامی هەیە، هەمیشە لە خزمەت خەڵكدا بووە، منیشی زۆر خۆشدەوێت. هەروەها  زۆر شتیش لە مامۆستا عومەر چنگیانییەوە فێربووم.
 
- لەنێو سۆشیالمیدیا زۆر ئەكتیڤی، لەگەڵ ئەوەشدا كۆمێنیتی زۆرت بۆ دەنووسرێت، هەموو كۆمێنتەكان دەخوێنیتەوە؟
 

هەڵكەوت زاهیر: وابزانم من لە كوردستان زۆرترین كۆمێنتم بۆ دەنووسرێت، جاری وا هەیە بۆ پۆستێكم 8-9 هەزار كۆمێنت دەنووسرێن، بەهۆی سەرقاڵیمەوە ناتوانم هەموو كۆمێنتەكان بخوێنمەوە، بەڵام هەندێجار لەلایەن هاوڕێیەكانمەوە كۆمێنتەكانم بۆ دەنێرنەوە و دەیانبینم. لە كۆمێنتەكان قسەی نەگونجاویشم بۆ دەنووسن، بەڵام قەت نایسڕمەوە. خەڵك ئازادە چی دەنووسێت و چی دەڵێت. 
 
- پەیوەندیت لەگەڵ سەركردە ئیسلامییەكانی كوردستان هەیە؟ 
 
هەڵكەوت زاهیر: لەگەڵ بەڕێز ئەبوبەكر كاروانی هاوڕێیەتیمان هەیە، تێكستی ئەوم كردووەتە سروودێكی نیشتمانی، هیوادارم لە ئایندەشدا بتوانم بۆ سروودی ئاینی كاری لەگەڵ بكەم. كەسایەتییەكی زۆر رۆشنبیر و بەڕێزە لەلای من، سەرسامم بە كەسایەتی مامۆستا ئەبوبەكر كاروانی، نموونەیەكی جوانی پیاوی ئاینی و سیاسییە، لەبواری نووسیندا زۆر بە توانا و لێهاتووە. جگە لەوەش من زۆر حەز بە تێكەڵی سیاسەت ناكەم، من كاری هونەری دەكەم.
 
- دوایین پرۆژەت چییە؟
 
هەڵكەوت زاهیر: ساڵی رابردوو كۆمەڵێك بەرهەمی زۆر باشم بڵاوكردەوە. بۆ ئەمساڵیش كۆمەڵێك بەرهەمم هەیە. یەكەمین بەرهەمیش لەسەر نەخۆشیی شێرپەنجە بوو كە هونەرمەندان میرا و دینا گوتوویانە. هەروەها كارێكی نوێم بۆ هونەرمەند پەرواز هەیە، چەند كارێكی دیكەم بۆ شانیا هەیە، بۆ هونەرمەند دیانا كەرەزۆن سەرقاڵی چەند بەرهەمێكین. هەروەها دوو گۆرانیم بۆ تارا رەسوڵ ئامادەیە كە یەكێكیان بۆ مانگی رەمەزانە. بۆ هونەرمەند شاباز زەمانی بەرهەمێكم ئامادەیە كە رەنگە لە مانگی ئادار بڵاوبكرێتەوە، میرا و دیناش بۆ مانگی رەمەزان چەند بەرهەمێكی ئاینییان دەبێت.

سەرچاوە: رووداو