سبەینێ‌ تیروپشك بۆ ناوی حاجییانی ئەمساڵ دەكرێت

113 جار خوێندراوەتەوە کات08:34 بەروار18-01-2020
سبەینێ‌ تیروپشك بۆ ناوی حاجییانی ئەمساڵ دەكرێت

راچڵەكین ـ

وەزارەتی ئەوقاف و كاروباری ئایینی حكومەتی هەرێمی كوردستان ئاشكرای دەكات، كە سبەینێ‌ تیروپشك بۆ حاجییانی ئەمساڵ  ئەنجام دەدرێت و دەشڵێت "پشكی هەرێم چوار هەزار و 500 حاجییە".

نەبەز ئیسماعیل، وتەبێژی وەزارەتی ئەوقاف و كاروباری ئایینی هەرێم بە (راچڵەكین)ی راگەیاند" سبەینێ‌ یەكشەممە 19⁄ 1⁄ 2020 لەدیوانی وەزارەتی ئەوقاف و كاروباری ئایینی بەئامادەبوونی دادوەران و لایەنی پەیوەندیدار، تیروپشك بۆ ناوی حاجییان بۆ ئەمساڵ 2020 ئەنجام دەدرێت".

ڕاشیگەیاند، لە ساڵی 2017 دا 86 هەزار كەس ناوی نووسی بۆ ئەنجامدانی فەریزەی حەج و لەو ساڵەدا تیروپشك بۆ ناوی حاجییان بۆ ساڵەكانی (2017 و 2018 و 2019) ئەنجام درا.

ئاشكراشی كرد، ئەو ناوانەی لای ئێمە ماون و حەجیان ئەنجام نەداوە 72 هەزار و 202 كەسن و داوای ئەنجامدانی فەریزەی حەج دەكەن، بۆیە تیروپشكیان بۆ دەكرێت و بۆ ئەمەش ناوی چوار هەزار و 500 كەس ڕادەكێشرێت بۆ ئەوەی لەمساڵدا فەریزەی حەج ئەنجام بدەن.